Lehendakari: “Zenbat test azkar jasoko ditugun eta noiz, beharrezkoa da jakitea"

Lehendakariak Pedro Sánchez presidenteak deitu duen erkidegoetako presidenteen bileran parte hartu du.

Iñigo Urkullu Lehendakariak parte hartu du, bideokonferentzia bidez, Pedro Sanchez Espainiako Gobernuko presidenteak Covid-19 koronabirusak sortutako egoerari buruz hitz egiteko deitu duen erkidegoetako presidenteen bileran.


Bileraren baitan Lehendakariak Eusko Jaurlaritzaren ekimenak aurkeztu ditu lehentasunezko bost arloetan: Osasun sistema indartzea; Pertsona eta familia ahulenak babestea; Segurtasuna bermatzea; Enpresa eta autonomoei laguntzea; eta Etxeetatik eskolak mantentzea.


Horretaz gain, hiru izan dira luzatu dituen hausnarketak. Alde batetik “erabatekoa” dela Eusko Jaurlaritzaren prestutasuna laguntza eskaintzeko zein, beharrezkoa denean, laguntza eskatzeko. Adierazi duenez, “Une honetan gure Lehentasuna da osasun profesional gehiago izatea eta osasun materialaren hornikuntza bermatzea”.


Bestetik, Osasun Ministerioak datuak jasotzeko irizpide bakarra ezartzea eskatu egin dio Espainiako Gobernuari. “Horrela baino ez dugu lortuko Estatuaren egoeraren inguruko egiazko informazioa”, gehitu du. Gainera, mahai gainean jarri du autonomia-erkidegoek zenbat test azkar jasoko dituzten eta noiz jasoko dituzten jakiteko beharra. Orain arte, Euskadin krisia baliabide propioekin kudeatzen ari direla, azpimarratu du.


Bukatzeko, Europa osoan hartu behar diren erabaki estrategikoak oso garrantzitsuak direla azpimarratu du eta Europar Batasunaren esparruan jarduteko batasun handiagoa defendatu du.

Har itzazu kontuan osasun agintariek Koronabirusa saiheste aldera emandako gomendioak zeintzuk diren. Kaleratzen diren albiste faltsuak egonda ere, agintari eta profesionalek emandako gomendioei egin behar diezu kasu. Gai honen inguruan zalantzak baldin badituzu edo bidaia baten ondoren sintomak baldin badituzu, Osasun Kontseiluak eskaintzen dizun telefono zenbakira dei zenezake: 900 20 30 50 (EAEn) eta 948 290 290 (Nafarroan). Ez ezazu ahaztu COVID-19 gaitza ez hedatzeko, etxean geratzea duzula onena eta beharrezko kasuetan soilik ateratzea. Eskuak sarri garbitzea ere gomendagarria da eta sintomak dituzun kasuetan, ahoa estaltzeko maskarak ere erabil ditzakezu, batez ere adineko pertsonekin harremanetan baldin bazaude.


#Ataun #Irratia #AtaunIrratia #Albistea #Gizartea #Koronabirusa #Osakidetza #EuskoJaurlaritza #SegurtasunSaila #OsasunSaila #EuskalHerria #Euskadi #Gipuzkoa #Bizkaia #Araba #Nafarroa #IparEuskalHerria #Espainia #Mundua #IñigoUrkullu #NekaneMurga

ATI © 2020

Webgune hau eta bertako eduki guztiak, copyright lizentzia baten mende daude