Urkulluk Covid-19k eragindako osasun-krisiaren aurrean Jaurlaritzak egindako kudeaketa azaldu du

Urkullu lehendakariak, Murga Osasun sailburuak eta Beltrán de Heredia Segurtasun sailburuak lagunduta, agerraldia egin du gaur goizean.

Lehendakariak Covid-19 pandemiak eragindako osasun-krisiaren eta alarma-egoeraren aurrean Jaurlaritzak hartu dituen eta hartuko dituen neurriak azaldu ditu. Hala, egindako jardueraren berri emateko, Lehendakariak hiru fasetan egituratu du bere hitzaldia: aurrea hartzea, Birusaren hedapena gelditzea eta Osasun-larrialdia arintzea. Lehendakariak azaldu duenez: - Lehenik eta behin, aurrea hartzeko fasean, Osasun Sailak erabakiak hartu zituen Osasunerako Mundu Erakundeak Nazioarteko Osasun Larrialdia deklaratu aurretik. - Bigarren fasean, lehen positiboaren ondoren, Jaurlaritza gogotik aritu zen lanean birusaren hedadura geldiarazteko, beti ere adituen irizpideetan oinarrituta. - Hirugarrenik, osasun-larrialdia eta alarma-egoera dekretatu ondoren, bitarteko guztiak jarri dira birusaren hedapena saihesteko, funtsezko zerbitzuak bermatzeko eta, era berean, behar gehien dituztenei baliabideak errazteko.

Lehendakariak onartu du sortutako egoera larria izan dela, eta neurriak hartzera behartuta ikusi dutela beren burua. "Hartu ditugu. Lehen unetik. Osasun agintarien orientabideak jarraitu ditugu. Beti ere aurkeztu zaizkigun egoera guzti-guztiei aurre egiteko asmoz ", adierazi du. Orain, behin birusaren hedapena geldituta, Lehendakariak konfiantza mantentzen du osasun-larrialdia arintzean, eskura dituzten baliabideekin. "Denborak esango du asmatu dugun edo ez, baina ez diogu erabakiak hartzeari utzi nahi izan", azpimarratu du. Era berean, Lehendakariak, Covid-19k enpleguan, jardueran eta enpresen etorkizuneko bideragarritasunean izango duen eragina aipatuz, aitortu du pultsu ekonomikoa berreskuratzea oso zaila izango dela. "Jarduerari berriz ekiteak denbora eta ahalegina eskatuko du", adierazi du. Ildo horretan, azaldu du Eusko Jaurlaritza dagoeneko lanean ari dela ekonomia suspertzeko eta enplegua sortzeko plan batean, "Euskadi Zutik". "COVID 19ko pandemia gainditzen dugunean, ahalik eta giza kostu txikienarekin, altxatu egin behar dugu, Euskadi martxan jarri behar dugu. Golpatuta aterako gara, minduta, baina aurrera aterako gara ", azpimarratu du Lehendakariak. Bestalde, Nekane Murga Osasun sailburuak koronabirusak Euskadin duen egoerari buruzko datu eguneratuen berri eman du, eta, estatistiken zerra-hortzek erakusten dituzten datuak gorabehera, eskura dagoen informazioan oinarrituta, Euskadi gaixotasuna egonkortzeko egoeran dagoela nabarmendu du, eta meseta-fasean. Ildo horretan, 3 alderdi zehatz azpimarratu ditu: proba asko egitea, kasu berrien egonkortasuna asistentzia-jardueran islatzea, eta hildakoen kopuruak gora egitea, bai eta sendatutakoen edo alta emandakoen kopuruak ere.

Har itzazu kontuan osasun agintariek Koronabirusa saiheste aldera emandako gomendioak zeintzuk diren. Kaleratzen diren albiste faltsuak egonda ere, agintari eta profesionalek emandako gomendioei egin behar diezu kasu. Gai honen inguruan zalantzak baldin badituzu edo bidaia baten ondoren sintomak baldin badituzu, Osasun Kontseiluak eskaintzen dizun telefono zenbakira dei zenezake: 900 20 30 50 (EAEn) eta 948 290 290 (Nafarroan). Ez ezazu ahaztu COVID-19 gaitza ez hedatzeko, etxean geratzea duzula onena eta beharrezko kasuetan soilik ateratzea. Eskuak sarri garbitzea ere gomendagarria da eta sintomak dituzun kasuetan, ahoa estaltzeko maskarak ere erabil ditzakezu, batez ere adineko pertsonekin harremanetan baldin bazaude.


#Ataun #Irratia #AtaunIrratia #Albistea #Gizartea #Koronabirusa #Osakidetza #EuskoJaurlaritza #SegurtasunSaila #OsasunSaila #EuskalHerria #Euskadi #Gipuzkoa #Bizkaia #Araba #Nafarroa #IparEuskalHerria #Espainia #Mundua #IñigoUrkullu #NekaneMurga #EstefaníaBeltraDeHeredia

Nahikobero

ARROSA SAREA

arrosa-logo-berria.png

Ataun Irratia, Arrosa Irrati sarearen parte da 2020ko maiatzetik eta elkarlanean zenbait jarduera eskaintzen ditu.

EUSKARA

Ataun Irratia eta bere eduki guztiak euskaraz ikusi, irakurri eta entzuteko aukera duzu.

ATI CC 2020